லிங்கா வசூல் நிலவரம்

தமிழகத்தில், எந்திரன் படத்தி்ன் முதல்நாள் வசூல் சாதனையை, லிங்கா படம் முறியடித்துள்ளது. மாநிலத்தின் பல்வேறு தியேட்டர்களில்,
சிறப்புக்காட்சிகள் திரையிடப்பட்டன. இந்த சிறப்புக்காட்சிகளை தவிர்த்து, ரெகுலர் காட்சிகளின் மூலமாக மட்டுமே, ரூ. 17 கோடியை, லிங்கா வசூலாக ஈட்டியுள்ளது. தமிழகத்தில் முதல் நாளில் ரூ 11 கோடியை எந்திரன் வசூலித்திருந்ததுதான் இதுவரை சாதனையாக இருந்தது. ஆந்திராவில் லிங்காவுக்கு அமோக வரவேற்பு கிடைத்துள்ளது. அங்கு முதல் நாளில் ரூ 8 கோடி வசூலாகியுள்ளதாக தெரிவிக்கப்பட்டுள்ளது.

‘லிங்கா’ படத்தை ராக்லைன் வெங்கடேஷ் தயாரித்துள்ளார். இதன் மொத்த செலவு ரூ.110 கோடிவரை இருக்கும் என்கின்றனர். ஈராஸ் நிறுவனம் உலகம் முழுவதும் திரையிடும் உரிமையை பெற்றது. ரூ.130 கோடி கொடுத்து அந்த நிறுவனம் இப்படத்தை வாங்கியதாக கூறப்படுகிறது. டெலிவிஷன் உரிமைகள் ரூ.80 கோடிக்கு விற்கப்பட்டு உள்ளன. படம் ரிலீசாகும் முன்பே ரூ.90 கோடிவரை லாபம் ஈட்டியதாக கூறப்படுகிறது. 

ரஜினி படங்கள் கடந்த 4 வருடங்களாக வரவில்லை. கோச்சடையான் அனிமேஷன் படமாக வந்தது. நீண்ட இடைவெளிக்கு பிறகு ‘லிங்கா’ வந்ததால் ரசிகர்களிடம் பலத்த எதிர்பார்ப்பு ஏற்பட்டது. ஆர்வத்தோடு படம் பார்த்தார்கள். 

இன்று விடுமுறை தினம் என்பதால் வசூல் அதிகமாகும் என்கின்றனர். இப்படத்தில் ரஜினி இரு வேடங்களில் நடித்துள்ளார். நாயகிகளாக அனுஷ்கா, சோனாக்சி சின்ஹா நடித்துள்ளனர். கே.எஸ். ரவிக்குமார் இயக்கியுள்ளார்.