சீதாவாகும் மது ஷாலினி

தெலுங்குத் திரையுலகில் 'ராமாயணம்' சார்ந்த பல கதைகள் அந்தக் காலத்திலிருந்தே தொடர்ந்து வெளிவந்து வெற்றி பெற்றுக் கொண்டிருக்கின்றன.
சில வருடங்களுக்கு முன் பாலகிருஷ்ணா - நயன்தாரா நடத்த 'ராம ராஜ்ஜியம்' திரைப்படம் வெளிவந்து மாபெரும் வெற்றி பெற்றது. பாலகிருஷ்ணா ராமர் கதாபாத்திரத்திலும், நயன்தாரா சீதா கதாபாத்திரத்திலும் மிகவும் பொருத்தமாக நடித்ததாக விமர்சகர்கள் முதல் ரசிகர்கள் வரை அனைவரும் பாராட்டித் தள்ளிவிட்டனர். தற்போது வேணு என்ற இயக்குனரின் இயக்கத்தில் 'சீதாவலோகனம்' என்ற பெயரில் ராமாயணம் சார்ந்த ஒரு சரித்திரப் படம் தயாராகி வருகிறது. இந்தப் படத்தில் சீதா கதாபாத்தில் மது ஷாலினி நடித்து வருகிறார்.தமிழில் பாலா இயக்கத்தில் வெளிவந்த 'அவன் இவன்' படத்தில் நாயகியாக நடித்தவர்தான் இந்த மது ஷாலினி. அதன் பின் இங்கு சொல்லிக் கொள்ளும்படியான படங்கள் அவருக்கு அமையவில்லை. தெலுங்கில் சில படங்களிலும், ஹிந்தியில் சில படங்களிலும் நடித்தார். தற்போது 'சீதாவலோகனம்' படத்தை மது ஷாலினி மிகவும் எதிர்பார்க்கிறாராம். சமீபத்தில் இந்தப் படத்தின் டீஸர் வெளியிடப்பட்டது. சீதா கதாபாத்திரத்தில் நடித்துள்ள மது ஷாலினியை பலரும் பாராட்டி வருகிறார்களாம். இதற்கு முன் சில பல படங்களில் மிகவும் கவர்ச்சியான தோற்றத்தில் மது ஷாலினி நடித்தவர்தான் என்றாலும் இந்தப் படத்தில் அவருடைய தோற்றமும் நடிப்பும் பொருத்தமாக அமைந்திருப்பதாகச் சொல்கிறார்கள்.