ரஜினிகாந்த் நடித்த மோஷன் கேப்சரிங் டெக்னாலஜி படமான 'கோச்சடையான்' படத்தால் அவருடைய ரசிகர்களுக்கு மட்டுமல்ல மற்ற ரசிகர்களுக்கும் மிகப் பெரிய திருப்தி ஏற்படவில்லை. ரஜினியை ரஜினியாக மட்டுமே அவர்கள் பார்க்க விரும்பினார்கள். அதைப் புரிந்து கொண்ட ரஜினிகாந்த் உடனடியாக ரசிகர்களுக்காக தன் உடல்நிலையையும் பொருட்படுத்தாமல் 'லிங்கா' படத்தில் நடிக்க ஆரம்பித்துவிட்டார். கே.எஸ்.ரவிக்குமார் இயக்கத்தில், ஏ.ஆர்.ரகுமான் இசையைமப்பில் படம் உருவாகி வருவதால் நிச்சயம் அனைத்து ரசிகர்களையும் படம் திருப்திப்படுத்திவிடும் என்ற எதிர்பார்ப்பும் உள்ளது.
கடந்த சில மாதங்களாகவே இடைவிடாமல் படப்பிடிப்பு நடந்து கொண்டு வந்தது. கடந்த வாரம் 'ஐ' இசை வெளியீட்டில் ரஜினிகாந்த் கலந்து கொண்டதால் சில நாட்கள் படப்பிடிப்பை நிறுத்தி வைத்தார்கள். அதன் பின் அவர் மீண்டும் படப்பிடிப்பில் கலந்து கொண்டார். இரண்டு நாட்களுக்கு முன் 'லிங்கா' படத்தின் கிளைமாக்ஸ் படப்பிடிப்பு ஆரம்பமானது. ஹாலிவுட் ஸ்டண்ட் மாஸ்டரான லீ விடேகர் தலைமையில் கிளைமாக்ஸ் சண்டைக் காட்சிகள் படமாக்கப்பட்டு வருகின்றன. 'டை ஹார்ட், ஃபாஸ்ட் பைவ்' உள்ளிட்ட பல படங்களுக்கு ஸ்டண்ட் அமைத்துக் கொடுத்தவர்தான் லீ விடேகர். அதனால் 'லிங்கா' படத்தின் சண்டைக் காட்சிகள் ரஜினிகாந்த் ஸ்டைலுடன் இன்னும் பலமாக இருக்கும்படி படமாக்கப்பட்டு வருகிறது.
கருத்துரையிடுக